الوان رغاوى البيرة الساقعة

** باخد

م الألم

صلابته

يمكن

ع الأقل أفضل

على نفس درجة السلم

اللى قبل البدروم .

الوان رغاوى البيرة الساقعة

**

لما الدنيا

تدينى شوية سعادة

ألقى م الواجب

اسعاد بعض الناس القريبين

حاجة تشبه

زكاة السعادة .

الوان رغاوى البيرة الساقعة

**صحيح

المكان بيفرح بصحابه

و الأرض بتعرف ناسها ؟

طب

التربة ازاى مفتوحة و مستنية ،

ازاى قادرة تلم عظامنا ،

و ترابها أبيض

مع اننا ألوان ؟

ازاى

الأرض بتعرف ناسها

وهى محطات

عليها الرايح

و الجاى !

ال

** الحب

كائن متكامل

مش محتاج ورثة

ولا اذن

دخول

الوان رغاوى البيرة الساقعة

**

طول الوقت

بتحاول

تشترى البهجة واللمة

بضعف التمن

ومع كدة

جرحت كل اللى قرب منك

وبكيت لوحدك

على بهجتك .

*****

الوان رغاوى البيرة الساقعة

**

حيران

فى رسم تفاصيل

ماتخلكش مجرد بحار عجوز

بيتباهى بركوب البحر م الصبا

بشرب الخمرة والسيجارة ف بقه

وإنك مابيحصلكش دوار بحر

بس كذبت

لما داريت دموعك عن بنت حبتك/ ماحبتهاش

وقهرك لما حبيت وما اتحبتش

الشمس

لما صحتك م النوم

كات حبيبتك اتبخرت من

خرم باب قلبك

وفضلت بحار عجوز

وسيجارة ف جنب بقك

خيط مزيكا ف جرحك

وبنت عجزت ع الشط

جنب بيتها الرمل

المكتوب باسمك.

الوان رغاوى البيرة الساقعة

اليكم جميعا ... اليك وحدك

مقاطع من الديوان




باكره .....
المناديل الورق
فيها دموع عشاق ,
عرق لقى
وجيش اطفال ممكن يحتل العالم .
المناديل الورق
عامية
ماعندهاش شفقه
بتمسح كل الحاجات
بنفس الحياد
المناديل الورق
ما تنفعش ذكرى ..
ما فيهاش كتابة ع الحرف
عليها
كل غباوة التكنولوجيا



لو ليك ذاكرة فولازية
ما بتنساش حاجه ,
وعندها قدرة على تربيط الاشياء ببعضها
دا مش معناه انك سعيد
معناه انك ح تفضل
تجر قطر من الذكريات
و تعرف حقيقة
وجع الذاكرة .
باهرب
لعالم من صنعى لوحدى
القرب فيه
انك تبقى على راحتك
حتى لو كان وجودى مجرد حد
يرد عليك النفس
باكتفى ف العالم ده
بوجع الذكريات
بينى وبينك
ترابيزة واشواق حرمان
تبان م الخمرة
والخلفية
"ربك لما يريد ..احلامنا ح تتحقق
وكلامنا ح يتصدق ..
والغايب ح يعود "
ولما ترجع
تكون اتبدلت
وادوق وجع القرب